كيف أعرف تخصص الجامعة اللي يناسبني؟

تخصصك الجامعي.. قرار يبدأ من الثانوي

وباختصار: ركزعلى ثلاث نقاط أساسية شغفك و قدرتك و احتياج السوق.

1) اسأل نفسك: وش الشي اللي أقدر أشتغل عليه 6 ساعات بدون ما أحس؟

الشي اللي تحس فيه متعة حتى لو كان فيه تعب بس يصير تعب حلو فهذا غالبًا هو مجالك

2) اكتشف مهاراتك اللي الناس تمدحك فيها بدون ما تنتبه

أحيانًا غيرك يشوف فيك قدرات أنت ما لاحظتها.
يمكن عندك مهارة حل المشكلات أو دقة عالية أو أسلوب لطيف في التعامل أو سرعة تعلم.
هذه إشارات مهمة تساعدك تحدد اتجاهك.

3) تخيّل نفسك بعد 5 سنوات… وش المجال اللي لو تعلمته اليوم بتكون فخور فيه؟

هذا السؤال يكشف لك رغباتك العميقة، مو رغبات اللحظة.
التخصص اللي تحس إنه يمثلك بعد سنوات... غالبًا هو الأنسب لك.

من واقع تجربتي

تخرجت في فترة كورونا من الثانوي ما كان فيه احتفالات ولا وضوح للطريق الي بيكون بعد المرحلة هذي

وكان في بالي الأمن السيبراني لأني كنت احب البرمجة ولغات الحاسب وللحين. لكن انقبلت في دبلوم إلكترونيات شيء ما كان في التوقعات.

ومع ذلك، تعلمت منه، واكتشفت إن التخصص حلو وممتع وجدا استمتعت فيه وتخرجت منه الحمد الله .

4) التخصص ما يحددك أنت اللي تعطينه قيمته

في ناس درسوا تخصصات بسيطة ونجحوا نجاح كبير لأنهم اشتغلوا على نفسهم.
وفي ناس درسوا تخصصات كانو يتوقعون انها مضمونة الوظيفة وما استفادوا لأنهم ما طوروا مهاراتهم.
السر مو في اسم التخصص في الشخص الي يدرسه شغفه طاقته همته كيف يطور ويحسن من نفسه.

5) أهم خطوة جرّب قبل ما تختار

التجربة تكشف الحقيقة أكثر من ألف نصيحة.

• شوف كورسات قصيرة

• اسأل ناس يدرسون التخصص

• اقرا عن الوظائف المرتبطة فيه

• جرّب مشروع صغير

كل تجربة تعطيك وضوح أكبر وتجارب اكثر.

الختام

وفي الختام اختيار التخصص ليس قرار مصيري وعادي اذا ما عجبك تقدر تغير لأنها رحلة تعرف فيه نفسك أكثر وتكتشف فيه وش يناسب روحك قبل شهادتك.

يمكن الطريق يلفّ شوي ويمكن ما تبدا في المكان اللي كنتِ تتخيله بس الأكيد انك إذا عرفت شغفك وطوّرت مهاراتك، واشتغلت على نفسك، فـكل خطوة بتقودك لشيء أكبر مما توقعت.

التخصص مجرد باب أما النجاح الحقيقي فهو أنت وشلون تبني نفسك يوم بعد يوم وبسعادة وراحه.